2012-02-18(RFA)
ကြားဖြတ်ရွေးကောက်ပွဲမှာ ဝင်ရောက် ယှဉ်ပြိုင်မယ့် အမျိုးသား ဒီမိုကရေစီ အဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည် ကို ဆန့်ကျင်ရေးသားတဲ့ စာတစောင်ကို အမရပူရမြို့နယ်က ဒေါက်တာဇော်မြင့်မောင်ရဲ့ အိမ်ဝင်ပေါက် ရှေ့တည့်တည့်မှာ ဒီမနက်ပိုင်းက တွေ့ရတယ်လို့ ဆိုပါတယ်။ဒေါက်တာဇော်မြင့်မောင် NLD ကိုယ်စားပြုပြီး ဝင်ရောက်ယှဉ်ပြိုင်မယ့် မန္တလေးတိုင်း ကျောက်ပန်းတောင်းမြို့နယ်ကို ရောက်နေချိန်မှာ အဲဒီစာကို ချသွားတာ ဖြစ်တယ်လို့ သူ့ဇနီး ဒေါက်တာယုယုက ပြောပါတယ်။
A-4 အရွယ် စာတစ်ရွက်မှာ နှစ်မျက်နှာစလုံး ကွန်ပြူတာ စာစီရိုက်ထားပြီး ရန်ကုန်ရှိ နိုင်ငံခြားသံရုံးတွေက ဒေါ်အောင်ဆန်းစုကြည်ရဲ့ စည်းရုံးရေး ခရီးတွေမှာ ပါဝင်ကူညီနေကြောင်း၊ ဒေါ်အောင်ဆန်းစုကြည်ဟာ နိုင်ငံခြားအထောက်အပံ့ကို လက်ခံရယူနေကြောင်း ဝေဖန်ရေးသားထားပါတယ်။ ဒါပေမယ့် ဒီစာကို ဘယ်သူဘယ်ဝါ ဘယ်အဖွဲ့အစည်းက ရေးသားတယ်ဆိုတာ ဖော်ပြထားတာ မရှိဘူးလို့ ဆိုပါတယ်။
အရင်ကလည်း ခုလိုပဲ ဒေါ်အောင်ဆန်းစုကြည်ကို ဆန့်ကျင်ပုတ်ခတ်တဲ့ စာတွေ သူတို့အိမ်ရှေ့မှာ အထပ်လိုက် ချသွားဖူးတာ ရှိတယ်လို့လည်း ပြောပါတယ်။
ဒီစာကို ဘယ်အချိန်က ချသွားမှန်း မသိရဘဲ ဒေါက်တာယုယု တာဝန်ခံ ဖွင့်လှစ်ထားတဲ့ မနောသုခ အခမဲ့ ဆေးခန်းအတွက် ဆေးဝါးတွေကို မနက်တိုင်း လာယူတဲ့ ဆေးခန်း အမှုဆောင် အဖွဲ့ဝင်တစ်ဦးက မနက် ၉ နာရီလောက်မှာ တွေ့ရှိတာလို့လည်း သိရပါတယ်။
No comments:
Post a Comment