ယနေ.ထိပ်တန်းသတင်းများ

*မြန်မာ့အရေး စိန်ခေါ်မှု အမေရိကန်နဲ့ ပူးပေါင်းဆောင်ရွက်ဖို့ တရုတ်စိတ်ဝင်စား

 *ရွှေညဝါဆရာတော်ကို အရေးယူဖို့ သံဃာ့မဟာနာယက ပြင်ဆင် 

 *မြန်မာနိုင်ငံမှာ ဆန္ဒပြခွင့် မရှိသေး

*

မြန်မာပြည် ပြောင်းလဲမှုတွေ ဆက်ဖြစ်ဖို့ ကုလ ကြိုးပမ်းမည်

By ​ဒေါ်ခင်မျိုးသက်

Read more

မြန်မာနိုင်ငံမှာ တိုးတက်ပြောင်းလဲလာစေဖို့  ဒေသတွင်း မဟာမိတ်နိုင်ငံတွေဆီက ပူးပေါင်းဆောင်ရွက်မှုတွေရအောင် အာရှ ၃ နိုင်ငံကို သွားခဲ့တဲ့ မြန်မာနိုင်ငံဆိုင်ရာ အမေရိကန် အထူးကိုယ်စားလှယ် ဒဲရက်မစ်ချဲလ် (Derek Mitchell)ရဲ့ ခရီးစဉ်ဟာ မနေ့က အင်္ဂါနေ့က ပြီးဆုံးသွားခဲ့ပြီ ဖြစ်ပါတယ်။ မြန်မာအစိုးရ ရင်ဆိုင်နေရတဲ့ စိန်ခေါ်မှုတွေကို တရုတ်နိုင်ငံက အမေရိကန်နဲ့အတူ ပူးပေါင်းဆောင်ရွက်ဖို့ စိတ်ဝင်စားတာ တွေ့ရတယ်လို့ အခုနောက်ဆုံးသွားတဲ့ တရုတ်နိုင်ငံခရီးစဉ်အတွင်းမှာ မစ္စတာမစ်ချဲလ်ကပြောပါတယ်။ ဒါ့အပြင် မြန်မာနဲ့ အမေရိကန်အကြား ဆက်ဆံရေးကောင်းမွန်ဖို့ ကြိုးစားတာမှာလည်း တရုတ်နိုင်ငံအပေါ် ခြိမ်းခြောက်မှုတခုအဖြစ် မမြင်သင့်ဘူးလို့လည်း သူက ပြောပါတယ်။ အကြောင်းစုံကို ဒေါ်ခင်မျိုးသက်က တင်ပြပေးထားပါတယ်။
မြန်မာနိုင်ငံမှာ အပြောင်းအလဲတွေ ပိုပြီးလုပ်လာအောင် အားပေးဖို့နဲ့ အမေရိကန်-မြန်မာ ဆက်ဆံရေး ပိုမိုကျယ်ပြန့်လာအောင်လုပ်ဖို့ အပါအဝင် နိုင်ငံခြားရေးဝန်ကြီး ဟီလာရီကလင်တန် (Hillary Clinton) မြန်မာနိုင်ငံကို သွားရောက်ခဲ့တဲ့ နောက်ပိုင်းမှာ မြန်မာနိုင်ငံဆိုင်ရာ အမေရိကန် အထူးကိုယ်စားလှယ် မစ္စတာမစ်ချဲလ်ဟာ အာရှ သုံးနိုင်ငံခရီးကို ထွက်လာခဲ့တာပါ။ သူဟာ ဒေသတွင်းနိုင်ငံတွေနဲ့ပါ မြန်မာ့အရေး ပူးပေါင်းဆောင်ရွက်နိုင်ဖို့ ကြိုးစားတဲ့အနေနဲ့ ဒီဇင်ဘာလ ၈ ရက်နေ့က တောင်ကိုရီးယားနိုင်ငံကို စတင်ခရီးထွက်ခွာခဲ့ပြီး ဂျပန်နိုင်ငံနဲ့ တရုတ်နိုင်ငံကိုပါ သွားရောက်ခဲ့တာပါ။ ဒီဇင်ဘာလ ၁၃ ရက်နေ့မှာ တရုတ်နိုင်ငံမှာ ခရီးစဉ်ကို အဆုံးသတ်ခဲ့တယ်လို့ အမေရိကန်နိုင်ငံခြားရေး ၀န်ကြီးဌာန ပြောခွင့်ရက VOA ကိုပြောပါတယ်။
“မြန်မာနိုင်ငံဆိုင်ရာ မူဝါဒညှိနှိုင်းရေးမှူးနဲ့ အထူးကိုယ်စားလှယ်ဒဲရက် မစ်ချဲလ် (Derek Mitchell) ရဲ့ တရုတ်နိုင်ငံ ဒုတိယနေ့ ခရီးစဉ် အဆုံးသတ်သွားပြီ ဖြစ်ပါတယ်။ အင်္ဂါနေ့မှာ သူဟာ တရုတ်အစိုးရ အရာရှိကြီးတွေနဲ့ရော တရုတ်နိုင်ငံမှာရှိတဲ့ အာဆီယံနိုင်ငံ သံရုံးတွေက တာဝန်ခံတွေနဲ့ သာမက နိုင်ငံတကာအဖွဲ့အစည်းတွေနဲ့ပါတွေ့ဆုံခဲ့ပါတယ်။
ဒီလိုတွေ့ဆုံရာမှာ မြန်မာနိုင်ငံဆိုင်ရာ မူဝါဒ ညှိနှိုင်းရေးမှူး မစ္စတာ မစ်ချဲလ်က အမေရိကန်နိုင်ငံခြားရေးဝန်ကြီး ဟီလာရီကလင်တန် (Hillary Clinton) ရဲ့ မြန်မာနိုင်ငံခရီးစဉ် အပါအဝင် မြန်မာနိုင်ငံအပေါ်ထားရှိတဲ့ အမေရိကန်ရဲ့ မူဝါဒတွေနဲ့ ပတ်သက်ပြီး ဆွေးနွေးခဲ့သလို မြန်မာနိုင်ငံမှာ မကြာခင်အချိန်အတွင်း ဖြစ်ထွန်းတိုးတက်မှုတွေအပေါ် သူတို့ရဲ့အမြင်တွေကိုလည်း ဆွေးနွေးခဲ့ကြပါတယ်။ ဒါ့အပြင် ၂ နိုင်ငံ ဘုံအကျိုးစီးပွားဆိုင်ရာ ကိစ္စရပ်တွေ၊ မြန်မာနိုင်ငံ ပြုပြင်ပြောင်းလဲရေးနဲ့ လူသားချင်း စာနာမှုဆိုင်ရာ လိုအပ်ချက်တွေမှာ ပူးပေါင်း ဆောင်ရွက်နိုင်ခြေတွေကိုလည်း ဆွေးနွေးခဲ့ပါတယ်”
မြန်မာနိုင်ငံပြုပြင်ပြောင်းလဲရေးနဲ့ မြန်မာနိုင်ငံမှာလိုအပ်နေတဲ့ အကူအညီတွေပေးရေးကိစ္စတွေနဲ့ ပတ်သက်ပြီး တရုတ်နိုင်ငံကလည်း စိတ်ဝင်တစား ရှိနေတာတွေ့ရတယ်လို့ ဆိုပါတယ်။
“မြန်မာအစိုးရ ရင်ဆိုင်နေရတဲ့ စိန်ခေါ်မှုတွေနဲ့ ပတ်သက်ပြီး အမေရိကန်နဲ့တရုတ်တို့ ပူးတွဲဆောင်ရွက်ဖို့ ၂ နိုင်ငံစလုံးက စိတ်ဝင်တစား ရှိကြတယ်လို့ ပီကင်းမှာ အမေရိကန်အထူးကိုယ်စားလှယ်က ပြောပါတယ်။ မြန်မာနိုင်ငံအထဲမှာရော တရုတ်-မြန်မာ နယ်စပ်တကြောမှာပါ ရှိနေတဲ့ စိန်ခေါ်မှုတွေထဲမှာ မူးယစ်ဆေးဝါး တိုက်ဖျက်ရေး၊ လူကုန်ကူးမှု တိုက်ဖျက်ရေးနဲ့ ကျန်းမာရေးဆိုင်ရာ ပြဿနာတွေပါ ပါပါတယ်”
အခုလို ဒေသတွင်း နိုင်ငံတွေနဲ့ မြန်မာ့အရေး ပူးပေါင်းဆောင်ရွက်နိုင်ဖို့ လာရောက်ခဲ့တဲ့ မစ္စတာမစ်ချဲလ်ဟာ သူ့ရဲ့ တရုတ်နိုင်ငံခရီးစဉ်အပြီး ပီကင်းမှာ ပြုလုပ်တဲ့ သတင်းစာရှင်းလင်းပွဲမှာတော့  အမေရိကန်နဲ့ မြန်မာတို့ကြား ဆက်ဆံရေးတိုးတက်လာမှုအတွက် တရုတ်နိုင်ငံအပေါ် ခြိမ်းခြောက်မှုတခုအနေနဲ့ မမြင်သင့်ဘူးလို့ သတင်းထောက်တွေကို ပြောကြားခဲ့ပါတယ်။
ဒါ့အပြင် မြန်မာနိုင်ငံအတွက် သူ့အိမ်နီးချင်း ဘယ်နိုင်ငံနဲ့မှ ဆက်ဆံရေး တင်းမာတာမျိုး မဖြစ်စေချင်သလို တရုတ်-မြန်မာ ဆက်ဆံရေးမှာ အနုတ်လက္ခဏာတရပ် ဖြစ်လာစေဖို့ ရည်ရွယ်ချက်လည်း လုံးဝမရှိပါဘူးလို့ ဆိုပါတယ်။ မြန်မာနိုင်ငံနဲ့ မြန်မာနိုင်ငံသားတွေရဲ့အကျိုးစီးပွားနဲ့ ဒေသတွင်း တည်ငြိမ်အေးချမ်းရေးတွေအတွက် အမေရိကန်နဲ့တရုတ် ၂ နိုင်ငံ အတူပူးပေါင်းဆောင်ရွက်နိုင်ခြေတွေနဲ့ပတ်သက်ပြီး တရုတ်နိုင်ငံဘက်က တွက်ဆချက်တွေ၊ အမြင်တွေကို သိရဖို့အတွက် တရုတ်အရာရှိတွေနဲ့ ဆွေးနွေးခဲ့တယ်လို့လည်း သတင်းထောက်တွေကို ပြောပါတယ်။
မြန်မာနိုင်ငံအပေါ် စီးပွားရေးပိတ်ဆို့ အရေးယူမှုတွေကို ရုပ်သိမ်းပေးဖို့ မကြာသေးခင်ကပဲ တရုတ်နိုင်ငံခြားရေး ဝန်ကြီးဌာနက ကြေညာချက် ထုတ်ပြန်ခဲ့ပါတယ်။ ဒီအရေးယူဒဏ်ခတ်မှုဟာ မြန်မာနိုင်ငံမှာ လူ့အခွင့်အရေး ချိုးဖောက်မှုတွေနဲ့ ဒီမိုကရေစီရေး ဖိနှိပ်မှုတွေကြောင့် ချမှတ်ထားတာမို့ မြန်မာနိုင်ငံတွင်း ပြုပြင်ပြောင်းလဲမှုတွေ ဆက်ပြီး လုပ်လာခဲ့ရင် ရုပ်သိမ်းပေးဖို့ ဖြစ်လာမယ်လို့ နိုင်ငံခြားရေးဝန်ကြီး ဟီလာရီကလင်တန် (Hillary Clinton) က မြန်မာနိုင်ငံခရီးစဉ်အတွင်း ပြောကြားခဲ့တာပါ။
မြန်မာနိုင်ငံမှာ ပြုပြင်ပြောင်းလဲမှုတွေ အများကြီး တွေ့လာရပေမယ့် အပြောင်းအလဲတွေ ဆက်ပြီးလုပ်ဖို့ အတွက် လိုအပ်နေတာတွေ အများကြီး ရှိနေသေးသလို မြန်မာနိုင်ငံရဲ့ အနာဂတ်နိုင်ငံရေးအတွက် မေးခွန်းထုတ်စရာတွေ ရှိနေသေးတယ်လို့ မစ္စတာမစ်ချဲလ်က ပီကင်းမှာ ပြောကြားခဲ့ပါတယ်။  ဒါပေမယ့် အခုလိုပဲ အပြောင်းအလဲတွေ ဆက်ပြီး လုပ်နေမယ်ဆိုရင် မြန်မာနိုင်ငံ ဒီမိုကရေစီရေးခရီးလမ်းကို လျှောက်လှမ်းရာမှာ အမေရိကန်နိုင်ငံက မိတ်ဆွေကောင်းတယောက်အဖြစ်နဲ့ ရပ်တည်နေမှာ ဖြစ်သလို တွေ့လာရတဲ့ တိုးတက် ပြောင်းလဲမှုတွေအတွက် တဆင့်ချင်း အကူအညီတွေတိုးပေးပြီး တုံ့ပြန်ဖို့ ရှိတယ်လို့လည်း ပြောကြားခဲ့ပါတယ်။

ရွှေညဝါဆရာတော်ကို အရေးယူဖို့ သံဃာ့မဟာနာယက ပြင်ဆင်

By ကိုကျော်အောင်လွင်

ဓာတ်ပုံ voa 

၁၉၈၈ ခုနှစ် အရေးအခင်း ၂၃ နှစ်ပြည့် အခမ်းအနားတွင် တရားပေးနေသော ရွှေညဝါဆရာတော်

လူမှုကူညီရေးလုပ်ငန်းတွေ ဆောင်ရွက်နေတဲ့ ရန်ကုန်တိုင်း၊ ကြည့်မြင်တိုင်မြို့နယ်က ရွှေညဝါဆရာတော် ဦးပညာသီဟကို အရေးယူဆောင်ရွက်ဖို့ သံဃာ့မဟာနာယက အဖွဲ့က ကြေညာချက် ထုတ်ပြန်ထားပါတယ်။ ဆရာတော်ကတော့ ဒီကိစ္စကို ငြိမ်းချမ်းနဲ့နည်းနဲ့ ဖြေရှင်းမယ်လို့ဆိုတဲ့ အကြောင်း ဆရာတော်နဲ့နီးစပ်သူတဦးက ဗီအိုအေကို ရှင်းပြပါတယ်။ ဆရာတော်ကို သံဃာ့ မဟာနာယက ခြိမ်းခြောက်လာတာဟာ မတရားသဖြင့်လုပ်နေတာပဲလို့လည်း ပြည်ပရောက် သံဃာအဖွဲ့အစည်းတခုက တုံ့ပြန်ပါတယ်။ ဆရာတော်ရဲ့ကျောင်းတိုက်ကို ရဲတွေ ၀ိုင်းထားတယ် လို့လည်း သတင်းတွေထွက်နေပါတယ်။ အခြေအနေတွေကို  ကိုကျော်အောင်လွင်က တင်ပြပေးထားပါတယ်။

ဆရာတော် သီတင်းသုံးနေတဲ့ သာဓုကျောင်းတိုက်ကနေ ဆရာတော်ကို ဖယ်ရှားဖို့နဲ့ သံဃာ့အဖွဲ့ အစည်းတွေရဲ့ ဆုံးမတာကို မနာခံတဲ့ ဒုဗ္ဗစပုဂ္ဂိုလ်အဖြစ် သတ်မှတ်ဖို့နဲ့ သံဃာ့မဟာနာယက အဖွဲ့ရဲ့ ခွင်ပြုချက်မရဘဲ သာဓုကျောင်းတိုက်အတွင်း ဘာ သင်တန်းမှ မဖွင့်ဖို့ ဆုံးဖြတ်ခဲ့တယ်လို့ ဒီဇင်ဘာလ ၁၂ ရက်နေ့စွဲနဲ့ ထုတ်ပြန်တဲ့ သံဃာ့နာယကအဖွဲ့ရဲ့ ကြေညာချက်ထဲမှာ ဖော်ပြထားပါတယ်။ မနေ့ကညတုန်းကလည်း ရွှေည၀ါဆရာတော်ရဲ့ကျောင်းတိုက်ကို လုံခြုံရေးရဲတွေ ၀ိုင်းထားတယ်ဆိုပြီး သတင်းတွေထွက်နေတာကြောင့် ဆရာတော်နဲ့နီးစပ်တဲ့ ၈၈ မျိုးဆက်ကျောင်းသား စမ်းချောင်း ကိုကိုကြီးကို အခြေအနေတွေသိရအောင် မေးကြည့်ပါတယ်။
“ကျနော်ပြန်လာတဲ့အထိတော့ မတွေ့ခဲ့ပါဘူး။ ည ၁၁ ထိုးခါနီးမှ အဲဒီကနေပြန်လာတာပါ။ ဆရာတော်နဲ့ပတ်သက်ပြီးတော့ တိုင်းဒေသကြီး၊ သံဃာ့နာယကအဖွဲ့က ကြေညာချက် ထုတ်ထားတာကို တွေ့ရပါတယ်”
“ဒီကြေညာချက်ဟာ အာဏာပိုင်တွေဘက်က တရားဝင် ထုတ်ပြန်တဲ့ ကြေညာချက်လား။ ဒီကြေညာချက်ကိုဆရာတော်ဦးပညာသီဟကရော လက်ခံရရှိသလား။ အဲဒါကိုကိုကြီးတို့သိပါသလား”
“ဆရာတော့်ဆီကို ည၆နာရီလောက်ကအဲဒီစာရောက်လာပါတယ်။ စာကတော့ ဒီဇင်ဘာ ၁၂ ရက် နေ့စွဲနဲ့ ထုတ်ထားတဲ့စာပါ”
“ဆရာတော်က ဒီကြေညာချက်ကို ဘယ်လိုတုံ့ပြန်ပါသလဲ”
“ဆရာတော်ပြောတာရှင်းပါတယ်။ သူကတော့ငြိမ်းချမ်းရေးသမားပဲ။ တိုင်းပြည်ငြိမ်းချမ်းဖို့ ပြောဆိုနေတဲ့ သူတယောက်ပဲ ဖြစ်ပါတယ်။ ငြိမ်းငြိမ်းချမ်းချမ်းနဲ့ဒီကိစ္စကိုဖြေရှင်းရမှာလို့ ပြောပါတယ်”
“ဆရာတော်ကိုသာဓုကျောင်းတိုက်ကနေဖယ်ရှားရန်ဆိုတာ ပါပါတယ်။ ဆရာတော်က ဘယ်လို တုံ့ပြန်ပါလဲ”
“ဆရာတော်ကတော့ ဘာမှမတုံ့ပြန်ပါဘူး။ သူတို့ဆက်သွယ်ပြီး ဘယ်လိုဆောင်ရွက်လာမလဲ ဆိုတာကို စောင့်ကြည့်နေပါတယ်။ ဒီနေ့နေ့လည်တနာရီမှာလည်း သာဓုကျေုာင်းတိုက်မှာ ကျောင်းဖွင့်ပွဲ လုပ်ဖို့ ရှိပါတယ်။ အဲဒီမှာ သံဃာ့မဟာနာယကအဖွဲ့ဥက္ကဌ ဗန်းမော်ဆရာတော်ကြီးလည်းကြွလာဖို့ ရှိပါတယ်။ အဲဒီမှာ ဗန်းမော်ဆရာတော်ကြီးရဲ့မိန့်ကြားမှုကို နာယူမှာပါ”
ဆရာတော်နဲ့ မနေ့ကညပိုင်းအထိ ဆုံခဲ့တဲ့ စမ်းချောင်းကိုကိုကြီး ရှင်းပြခဲ့တာပါ။ မြန်မာနိုင်ငံလုံးဆိုင်ရာ သံဃာ့တပ်ပေါင်းစုရဲ့ပြည်ပတာဝန်ခံဆရာတော် ဦးပညာဇောတကတော့ သံဃာ့မဟာနာယကအဖွဲ့က အစိုးရဘက်ကလိုက်ပြီး ရွှေည၀ါဆရာတော်ကိုဖိအားပေးနေတာလို့ ဆိုပါတယ်။
“ဒီလိုဒုဗ္ဗစလို့ပြောခဲ့တာကတော့ အင်မတန်မှကို မဆီလျှော်တဲ့စကားလုံးကို သုံးတယ်လို့ ထင်ပါတယ်။ ပြောဆိုဆုံးမလို့မရတဲ့ ပုဂ္ဂိုလ်မျိုးတွေကိုသာလျှင် ဒုဗ္ဗစလို့ခေါ်တာပါ။ ဦးပညာသီဟ ဆိုလို့ရှိရင် ပြောဆို ဆုံးမလို့မရ ခက်တဲ့ ရဟန်းလည်း မဟုတ်ပါဘူး။ လောကအကျိုး၊ သာသနာ့အကျိုး၊ တိုင်းသူပြည်သားတွေရဲ့ အကျိုးစီးပွားကို ဆရာတော်က စွမ်းဆောင်နေတဲ့ပုဂ္ဂိုလ်ဖြစ်တယ်။
အစိုးရက ဒါမျိုးတွေ မကြိုက်တဲ့အတွက်ကြောင့် အစိုးရရဲ့ဖိအားပေးမှုကြောင့် ဆိုပြီးတော့ နိုင်ငံတော် သံဃာ့မဟာနာယကအဖွဲ့က ကြေညာချက်တွေထွက်တာပါ။ ဒါဟာလုံးဝကို မသင့်လျှော်တဲ့ စကားလုံးကို သုံးတာ ဖြစ်တယ်။ သံဃာ့မဟာနာယက ဆရာတော်ကြီးများအနေနဲ့က သာသနာ့ မျက်နှာကို ကြည့်မလား။ ဦးသိန်းစိန်အစိုးရရဲ့မျက်နှာကိုကြည့်မလားဆိုတာကို ဒီအချိန်မှာ ဆုံးဖြတ်ရမှာပါ။ ဦးပညာသီဟကို လုံးဝမလုပ်သင့်တဲ့ကိစ္စကိုလုပ်တယ်လို့ ဦးဇင်းအနေနဲ့ အဲသလိုနားလည်ပါတယ်”
ဦးပညာဇောတမိန့်ကြားခဲ့တာပါ။ ရွှေည၀ါဆရာတော် ဦးပညာသီဟဟာ ၂၀၀၈ ခုနှစ် နာဂစ်မုန်တိုင်း ဒုက္ခသည်တွေကို အကူအညီပေးခဲ့ပြီး ပရိယတ္တိစာပေတွေကိုလည်း သင်ကြားပို့ချပေးနေသူတပါး ဖြစ်ပါတယ်။ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ရဲ့နိုဘဲလ်ငြိမ်းချမ်းရေးဆု ရတာ အနှစ်၂၀ ပြည့်အထိမ်းအမှတ် အခမ်းအနားကိုလည်း ဆရာတော်ရဲ့သာဓုကျောင်းတိုက်မှာ ကျင်းပ ခဲ့ပြီး အမေရိကန်နိုင်ငံခြားရေးဝန်ကြီး ဟီလာရီကလင်တန်ရဲ့မြန်မာပြည်ခရီးစဉ်အတွင်းမှာလည်း လူမှုကူညီရေး ဆောင်ရွက်တဲ့ပုဂ္ဂိုလ်တဦးအဖြစ် ဆုံတွေ့ခဲ့ပါသေးတယ်။ ဆရာတော်ဟာ တရားဟောခွင့် တနှစ် အပိတ်ခံထားရတဲ့ပုဂ္ဂိုလ်လည်း ဖြစ်ပါတယ်။

မြန်မာနိုင်ငံမှာ ဆန္ဒပြခွင့် မရှိသေး

By မအေးအေးမာ

အစိုးရက ဆန္ဒပြခွင့်ဥပဒေ ထုတ်ပြန်ခဲ့ပြီးနောက်မှာ ပထမဆုံး အလုပ်သမား လှုပ်ရှားမှုတခုအဖြစ် သစ်လုပ်ငန်း လုပ်သားတွေ ရန်ကုန်မြို့မှာ ဆန္ဒပြ တောင်းဆိုမှုတခုကို လုပ်ခဲ့ကြပါတယ်။ ရန်ကုန်တိုင်း၊ တောင်ဒဂုံမြို့နယ် စက်မှုဇုံက သစ်အချောထည် စက်ရုံတခုက အလုပ်ထုတ်ခံခဲ့ရတဲ့ လုပ်သားတွေကိုတော့
ဆန္ဒပြခွင့် မရှိတဲ့အကြောင်း စက်ရုံ တာဝန်ရှိသူတွေက ပြောဆိုပြီးတော့ ဆန္ဒပြပွဲကို ရပ်ဆိုင်းဖို့ ဟန့်တား ခဲ့ကြတာပါ။ ပြဿနာကို မကျေနပ်ရင်တော့ အလုပ်သမားအရေးနဲ့ သက်ဆိုင်ရာ ဌာနတွေကို ဆက်ပြီး အကြောင်းကြားပေးမယ်လို့ ကတိပြုခဲ့တဲ့အကြောင်း ပြောပါတယ်။ အပြည့်အစုံကိုတော့ မအေးအေးမာက တင်ပြပေးထားပါတယ်။

လုပ်သက် ၇ နှစ်ကနေ ၁၄ နှစ်ကြာရှိတဲ့ တောင်ဒဂုံ စက်မူဇုံ အလုပ်သမားတွေကို အလုပ်ရှင်က လုပ်ငန်း လိုအပ်ချက်ကြောင့်ဆိုကာ နစ်နာကြေး နဲနဲပဲပေးပြီး အလုပ်သမားများကို အလုပ်က ဖြုတ်ပစ်ခဲ့တာကြောင့် ဆနပြမူဖြစ်ခဲ့တာပါ။ ဆနပြမူကို ရန်ကုန်တိုင်းဒေသကြီးက အလုပ်သမား ညွှန်ကြားမှု ဦးစီးဌာနမှူးကိုယ်တိုင် လာရောက်ပြီး အလုပ်ရှင်နဲ့ ညှိနှိုင်ခဲ့ပေမဲ့ ပြေလည်မူမရှိကြောင်း ဆန္ဒပြနေတဲ့ အလုပ်သမာတဦးက ပြောပါတယ်။

“အလုပ်သမားညွန်ကြားမှု ဦးစီးဌာန တိုင်းဦးစီးမှူးကနေပြီးတော့ ၀ါဏိဇ္ဇကို ဆက်တင်ပြီးတော့ ဖြေရှင်းပေးမယ် ဆိုပြီးတော့ သူတို့က အဲဒီလို ပြောသွားတယ်။ သူတို့က ကြားထဲကနေ ဖြေရှင်းပေးတာ။ အလုပ်ရှင်ဖက်က ခင်ဗျားတို့ တောင်းဆိုတာကို မပေးနိုင်ဘူး။ လူတထောင်ကိုပဲ သူတို့ ပေးမယ်။ ကျေနပ်မှု ရှိလား၊ ကျေနပ်မှု မရှိရင်တော့ ခင်ဗျားတို့ ၀ါဏိဇ္ဇကို ဆက်ပြီး ပြောမလားဆိုတော့ ကျနော်တို့ ဒီဇင်္ဘာရောက်မှ တက်မယ်ဆိုပြီး လက်မှတ် ထိုးပေးလိုက်တယ်။”

မနက်ပိုင်းမှာတော့ မြို့နယ် အလုပ်သမားညွန်ကြားမှု ဦးစီးဌာနကလာပြီး ဆန္ဒပြလို့ မရကြောင်း လာရောက် တားမြစ်ခဲ့တယ်လို့ ဆိုပါတယ်။ ဆန္ဒပြရခြင်း အကြောင်းရင်းကို ပြောပြခဲ့တာကတော့။

“ဆန္ဒပြပွဲကို လုပ်ရခြင်းကိုတော့ သူတို့က ဆန္ဒပြပွဲ လုပ်လို့ရဘူးပေါ့နော်။ သူတို့ ပေးတဲ့အထဲမှာ ကျနော်တို့ လုပ်သက် တစ်နှစ်လျှင် ၁,၀၀၀ ကျပ်နှုန်းဖြင့် လုပ်သက် နှစ်အလိုက် ဆုကြေးဆိုပြီးတော့ သူတို့က ပြောထားတယ်။ အဲဒါကို ကျနော်တို့ ၁၄ နှစ်ရှိရင် ၁,၄၀၀၀ ပဲ ရမယ်ပေါ့ဗျာ။ ကျနော်တို့ကို လျော်ကြေးပေး ထုတ်တဲ့အတွက် ကျနော်တို့ လုပ်သက် တစ်နှစ်ကို ၁,၀၀၀ နှုန်းနဲ့ ဒါ ဆုကြေးအနေနဲ့ ကျနော်တို့ကို ၁၄ နှစ်ရှိလို့ရှိရင် ၁,၄၀၀၀ ပေးမယ်။ ၁၀ နှစ်ရှိရင် ၁၀,၀၀၀ ပေါ့။ ဒီလိုပေးမယ်ဆိုပြီး သူက လွှတ်တယ်။
ဒီအပေါ်မှာ မကျေနပ်လို့ ဒီအချက်လေးကို ညှိပေးဖို့ ကျနော်တို့က ပြောတာပါ။ ကျနော်တို့က ဥပဒေအတိုင်း ဖြစ်စေချင်တာပေါ့။"

မြန်မာနိုင်ငံမှာ ငြိမ်းချမ်းစွာ စုဝေးခွင့် ဆန္ဒပြခွင့် ဥပဒေကို ဒီဇင်ဘာလ ၂ ရက်နေ့က အတည်ပြုပြီးတဲ့နောက် အခုလို ဆနပြမူတွေ ဖြစ်လာခဲ့တာပါ။ အခုဆန္ဒပြမူဟာ အလုပ်သမားတွေ အနေနဲ့ သူတိုရဲ့ လုပ်ငန်းခွင့်မှာ အလုပ်ရှင်ထံကနေ နစ်နာကြေးရဖို့ ပြတာဖြစ်တယ်လို့ ရန်ကုန်မြို့က ဥပေဒေအတိုင်ပင်ခံ ဦးအောင်သိန်းက ပြောပါတယ်။

“အခုဟာက သူတို့အလုပ်ရုံမှာ သူတို့ကိုမပေးရင် သူတို့က မဖျက်ဘူး။ သူတို့ အလုပ်လဲ ဆက်မလုပ်ဘူး။ သူတို့ကို ပေးရမယ့် တာဝန်တွေ ရှိတယ်။ သူတို့ကို တနှစ်မှ လျော်ကြေး ၁,၀၀၀ လောက်ပဲ ပေးတယ်ဆိုရင် အဲဒီမှာ ၇ နှစ်၊ ၈ နှစ်၊ ၉ နှစ် သမားတွေဆိုရင် ဘယ်လို လုပ်မလဲ။ သူတို့အတွက် သိပ်နစ်နာတယ်။ သူတို့ နစ်နာကြေးကို ညှိပေးဖို့အတွက် သူတို့ ဒီစက်ရုံထဲမှာပဲ ထိုင်ဆန္ဒပြတာပဲ။ ဘာမှ သူတို့ အော်တာ ဟစ်တာ မဟုတ်ဘူး။ ဖျက်တာ ဆီးတာ မဟုတ်ဘူး။ အဲဒီတော သူတို့ရဲ့ သူတို့ရဲ့ နစ်နာမှုအပေါ်မှာ အာဏာပိုင်တွေ
လာညှိပေးအောင် သူတို့ပြောတဲ့ ကိစ္စပဲ။

ဒါ ဥပဒေနဲ့တော့ မဆိုင်ဘူး။ ဆန္ဒပြပိုင်ခွင့်ဥပဒေနဲ့တော့ မဆိုင်ဘူးလို့ပဲ အန်ကယ်က ပြောမယ်။ ဆန္ဒပြခွင့် ဥပဒေက လုပ်ထုံး လုပ်နည်းတွေ မထွက်သေးတဲ့ အတွက် ဆန္ဒပြတဲ့ ဥပဒေ စုဝေးခွင့်နဲ့ ငြိမ်းချမ်းစွာ စုဝေးခွင့်နဲ့ ငြိမ်းချမ်းစွာ ဆန္ဒပြပိုင်ခွင့် ဆိုတဲ့ဥစ္စာဟာ လုပ်ထုံး လုပ်နည်းတွေကို ပြည်ထဲရေး ၀န်ကြီးဌာနက မထွက်သေးတဲ့အတွက် အဲဒါကို ခွင့်မပြုသေးဘူး ဆိုပြီးတော့ သူတို့ ဒါကို ကြိုခွင့်တောင်းတဲ့သူတွေအပေါ် တားမြစ်ထားတာပေါ့လေ။”

မြန်မာနိုင်ငံမှာ ပြည်တွင်းငြိမ်းချမ်းရေး ရရှိဖို့ အပါအ၀င် နိုင်ငံရေး တိုးတက်မှုတွေ ရရှိဖို့ တောင်းဆို ဆန္ဒပြကြမယ့် နိုင်ငံရေး တက်ကြွသူတွေရဲ့ လျှောက်ထားချက်ကိုတော့ အာဏာပိုင်တွေက လက်မခံပဲ ငြင်းဆန်ခဲ့တာ ဖြစ်ပါတယ်။ အခုလို အလုပ်သမားတွေ ဆန္ဒပြသလိုမျိုး ဆန္ဒပြလို့ မရဘူးဆိုတဲ့အကြောင်း လာရောက်ပိတ်ပင်ခဲ့ပါတယ်။

အလုပ်သမားတွေကတော့ ညနေပိုင်းမှာ ဆန္ဒပြမူကို ရုပ်သိမ်းခဲ့ပေမဲ့ ပြေလည်မူမရှိပဲ အလုပ်သမားနဲ့ အလုပ်ရှင် ညှိနှိုင်းပေးတဲ့ရုံးအထိတက်ပြီး နစ်နာကြေးရဖို့ လုပ်ဆောင်သွားမယ်လို့ ဆိုပါတယ်။

မြန်မာပြည် ပြောင်းလဲမှုတွေ ဆက်ဖြစ်ဖို့ ကုလ ကြိုးပမ်းမည်

By ကိုသားညွန့်ဦး

မြန်မာနိုင်ငံတွင်းမှာ အခြေအနေအရပ်အရပ်မှာ စိတ်ဝင်စားစရာကောင်းလောက်အောင် တိုးတက် ဖြစ်ထွန်းတွေ တွေ့နေရပြီး ဒီထက်ပို ဖြစ်ထွန်းတိုးတက်လာဖို့ ကုလသမဂ္ဂအနေနဲ့ ဆက်ပြီး ကြိုးပမ်း သွားမယ်လို့ ကုလသမဂ္ဂအတွင်းရေးမှူးချုပ် ဘန်ကီမွန်းက ပြောဆိုပါတယ်။ တချိန်တည်းမှာတော့ အကျဉ်းထောင်အတွင်း ကျန်နေတဲ့ နိုင်ငံရေးအကျဉ်းသားတွေကို အမြန်ဆုံး လွှတ်ပေးဖို့လည်း တောင်းဆိုပါတယ်။ ကိုသားညွန့်ဦးက တင်ပြပေးပါလိမ့်မယ်။
ကမ္ဘာ့နိုင်ငံတွေအကြား တနှစ်အတွင်း ဖြစ်ထွန်းတိုးတက်မှုတွေနဲ့ပတ်သက်လို့ မနေ့က နယူးယောက်  ကုလသမဂ္ဂရုံးမှာ အတွင်းရေးမှူးချုပ် ဘန်ကီမွန်းက သတင်းစာရှင်းလင်းပွဲလုပ်ရာမှာ မြန်မာနိုင်ငံ အကြောင်းကို ထည့်ပြောသွားပါတယ်။ မြန်မာနိုင်ငံမှာ အပြောင်းအလဲတွေ မြင်နေရပြီဆိုတာကို အသိအမှတ်ပြု ပြောပါတယ်။
“မြန်မာနိုင်ငံတွင်း အများလိုလားတဲ့ ပွင့်လင်းပြောင်းလဲမှုသစ် မြင်နေရပါပြီ။ ကုလသမဂ္ဂအနေနဲ့ တိုးတက်မှုတွေ ဆက်ရှိလာဖို့ ဆက်ပြီး ကြိုးပမ်းဆောင်ရွက်သွားပါမယ်”
ကုလသမဂ္ဂအတွင်းရေးမှူးချုပ်ဟာ မြန်မာအစိုးရ သမ္မတဦးသိန်းစိန်နဲ့ ပြီးခဲ့တဲ့ အာဆီယံ-ကုလ ဆွေးနွေးပွဲကာလအတွင်းမှာ တွေ့ဆုံခဲ့ပြီး လက်ရှိ ပြုပြင်ပြောင်းလဲမှုတွေကို အသိအမှတ်ပြုသလို အပြောင်းအလဲတွေ ပိုဖြစ်လာဖို့လည်း တိုက်တွန်းခဲ့ပါတယ်။ ဒါကြောင့်လည်း မကြာခင် မြန်မာနိုင်ငံကို သွားရောက်နိုင်ဖို့လည်း ပြင်ဆင်နေတယ်လို့ အတွင်းရေးမှူးချုပ်ရဲ့ ပြောခွင့်ရသူ Martin Nesirky က ဗွီအိုအေကို ပြောပါတယ်။
“မြန်မာအာဏာပိုင်တွေ ဖိတ်ကြားချက်ကြောင့် သူ မြန်မာနိုင်ငံကို သွားရောက်လိုတယ်ဆိုတာကို အတွင်းရေးမှူးချုပ်အနေနဲ့ တရားဝင် ပြောထားပြီးပါပြီ။ ဒီအတွက် မြန်မာနိုင်ငံကို ဖြစ်နိုင်သမျှ မြန်မြန် သွားရောက်နိုင်ဖို့ ပြင်ဆင်နေပါတယ်။ ဒါပေမယ့် ဘယ်တော့ သွားဖြစ်မလဲဆိုတာတော့ ခုချိန် မပြောနိုင်သေးပါဘူး”
လက်ရှိ မြန်မာနိုင်ငံအခြေအနေမှာ စိတ်ဝင်စားစရာကောင်းတဲ့ တိုးတက်မှုတွေ မြင်ရသလို ကုလသမဂ္ဂရဲ့ မြန်မာ့အရေး ပါဝင်ဆောင်ရွက်မှုကိုလည်း လက်ခံလာတာ တွေ့ရတယ်လို့ အတွင်းရေးမှူးချုပ် ပြောခွင့်ရသူ Martin က ပြောပါတယ်။
“မြန်မာနိုင်ငံတွင်း အခြေအနေအတော်များများမှာ စိတ်ဝင်စားစရာကောင်းလောက်အောင် တိုးတက်မှုတွေ မြင်လာရပါတယ်။ ဒီအထဲမှာ နိုင်ငံရေးလုပ်ငန်းစဉ်တွေလည်း ပါပါတယ်။ ဒီအထဲမှာ ဒေါ်အောင်ဆန်းစုကြည် ပါဝင်ပတ်သက်လာပါတယ်။
တိုင်းရင်းသားကိစ္စရပ်တွေမှာလည်း အာဏာပိုင်တွေဘက်က ပြောင်းလဲလာတဲ့ ခြေလှမ်းတွေ တွေ့လာရပါတယ်။ ကုလသမဂ္ဂရဲ့ အဖွဲ့အစည်းအချို့ဟာ မကြာခင်ကပဲ မြန်မာနိုင်ငံ မြောက်ပိုင်းက ချင်ပြည်နယ်နယ်စပ်ကို သွားရောက်ခွင့်ရခဲ့ပါတယ်။ ဒါဟာ အဲဒီဒေသတွင်းက ပြည်သူတွေ အတွက်တင်မဟုတ်ဘဲ ကုလသမဂ္ဂအဖွဲ့အစည်းတွေအနေနဲ့ အဲဒီက အခြေအနေတွေကို ကိုယ်တိုင် ကိုယ်ကျ သွားရောက် စစ်ဆေးလေ့လာခွင့်ရတာတွေဟာ အတော်လေး အရေးကြီးတဲ့ ကိစ္စရပ်တွေပါ”
ဒါပေမယ့် နိုင်ငံတကာက လိုလားတဲ့အခြေအနေတွေအတိုင်း ဖြစ်နေပြီလို့ ယူဆလို့မရသေးတဲ့ အကြောင်းလည်း ပြောပါတယ်။ အထူးသဖြင့် နိုင်ငံရေးအကျဉ်းသားတွေ လွတ်မြောက်လာရေး အပေါ်မှာ အတွင်းရေးမှုးချုပ်အနေနဲ့ အသေအချာ စောင့်ကြည့်နေတယ်လို့ ပြောခွင့်ရသူက ဆိုပါတယ်။
“အကျဉ်းထောင်တွေအတွင်း ကျန်ရှိနေတဲ့ နိုင်ငံရေးအကျဉ်းသားတွေ ဖြစ်နိုင်သမျှ မြန်မြန်ပြန်လွတ် လာသင့်တယ်ဆိုတဲ့ အတွင်းရေးမှူးချုပ်ရဲ့ အမြင်အယူအဆ မပြောင်းမလဲရှိနေပါတယ်။ လာမယ့် ရက်ပိုင်း သီတင်းပတ်တွေအတွင်းမှာ ဒီ အခြေအနေတွေ ဖြစ်လာမလားဆိုတာကိုလည်း ကျနော်တို့ အသေအချာကို စောင့်ကြည့်နေပါတယ်”
အတွင်းရေးမှူးချုပ် ဘန်ကီမွန်းအနေနဲ့ မြန်မာနိုင်ငံကို အရင်က နှစ်ကြိမ်လာခဲ့ပြီး နာဂစ်ကယ်ဆယ်ရေး ကိစ္စနဲ့ နောက်တကြိမ်က အမျိုးသားပြန်လည်သင့်မြတ်ရေးခေါင်းစဉ်နဲ့ဖြစ်ပါတယ်။
မြန်မာအာဏာပိုင်တွေနဲ့ တွေ့ဆုံပေမယ့်၊ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်နဲ့ တွေ့ခွင့်မရခဲ့ပါဘူး။ ဒီတခေါက်တော့ လာမယ့်နှစ်ဆန်းပိုင်းမှာ အတွင်းရေးမှူးချုပ်ရဲ့ တတိယမြောက် မြန်မာခရီးစဉ်ဖြစ်လာလိမ့်မယလို့ မျှော်လင့်ရပါတယ်။